Hospodarski plan delanskeje gmejny z někotrymi ćežemi

Róžant (SN/MWj). Za lěto 2024 móže gmejna Ralbicy-Róžant hišće nahladny hospodarski plan nastajić, byrnjež jón ­jenož ze swojimi likwidnymi srědkami wurunać móhli. Za přichodne lěta budźe to wjele ćešo. „Potom budźemy jenož hišće to najnuzniše zwoprawdźić móc“, praji wjesnjanosta Hubertus Ryćer (njestronjan) na zašłym posedźenju gmejnskeje rady. Do toho bě komornica Franciska Čapikowa najwažniše ličby předstajiła a tohorunja k lutowanju namołwjała.

Mjez dochodami a wudawkami maja deficit 255 000 eurow. Te drje móža ze swójskimi srědkami wurunać. Pjenjezy pak na druhich městnach pobrachuja. Něhdźe 570 000 eurow dyrbi gmejna jako swójski podźěl za wobhospodarjenje ­Ralbičanskeje pěstowarnje wudać. To je 140 000 wjace hač loni. Na tamnym boku dyrbja lětsa z něhdźe 80 000 eurami mjenje přemysłoweho dawka ličić. Tež zarjadniskemu zwjazkej Při Klóšterskej wodźe dyrbja wjace pjenjez płaćić. Za wotpłaćowanje swojich běžnych kreditow wudadźa 30 000 eurow.