Biskopstwo njewidźi tuchwilu potrjebu, so z njewšědnym zjawom zaběrać

Wotrow/Drježdźany (SN/MG). Njemało zadźiwali su so ludźo po wšej katolskej serbskej Łužicy zašły kónc tydźenja, jako kursěrowaše widejo postawy blisko Wotrowa. Postawa zwobraznja mać Božu a Jězusa. Z čoła Jězusa po wšěm zdaću krawješe, to rěka čerwjena kapka padnje. Reakcije běchu jara wšelake: Jedni rěčachu wo božim dźiwje, druzy wo manipulaciji, dalši chcychu přepytowanje dočakać. Fakt je, zo su wšelacy ludźo zjaw, kiž je so wospjetował, sami widźeli. A tež natočene wideja njejsu po našich informacijach technisce wobdźěłane. Ludźo, kotřiž su přitomni byli, twjerdźa, zo su so kapki po puću na zemju zaso zhubili.