Stare tradicije zdźěla znowa wozrodźili – sta křižerjow a tysacy přihladowarjow – próstwje wo měr
Budyšin/Rom/Hannover (CS/SN/BŠe/bn). Při najrjeńšim jutrownym wjedrje podachu so jutrowničku znowa dźewjeć procesionow w Hornjej Łužicy do susodneje wosady, wozjewjejo jutrowne poselstwo. Dohromady bě jich lětsa 1 380 křižerjow, na Wostrowcowskim ekumeniski procesionje zličichu 74 jěcharjow. Temperatura wokoło 23 stopjenjow přiwabi tysacy přihladowarjow. Mjez nimi bě sakski ministerski prezident Michael Kretschmer (CDU), kiž bě sej do Radworja dojěł. Na tamnišim kěrchowje wobhlada sej ze swójbu Budyskich křižerjow. Sakska statna ministerka za kulturu a turizm Barbara Klepsch (CDU) bě na wopyće w Pančicach-Kukowje. „Procesiony su wažny dźěl serbskeje kultury a identity. Dožiwjenje je za mnje tež jako wěriwa křesćanka jara hnujace“, wona podšmórny. Tež bywši sakski ministerski prezident Stanisław Tillich (CDU) bě sej klóšterski procesion wobhladał a wužiwaše składnosć, něhdyšich susodow wopytać.
