Na posedźenju měšćanskeje rady mějachu radźićelki a radźićeljo wčera, srjedu, někotryžkuli rozsud tworić. Najwjace z nich běchu z přidatnymi wudawkami zwjazane.

Budyšin (CS/SN). Na posedźenju měšćanskeje rady rozžohnowachu radźićelki a radźićeljo Haralda Webera na wuměnk. Wón bě nawoda twarskeho zarjada a bě rekord nastajił. Wón je cyłkownje 41 lět za měšćanske zarjadnistwo dźěłał. Za čas NDR bě wón so na mulerja wukubłał a hižo we 80tych lětach na jedyn a poł lěta jako twarski decernent dźěłał. Wón přewodźeše twar centera na Žitnych wikach. Kaž wón praji, běchu so w zarjadnistwje hižo do politiskeho přewróta wo to postarali, zo móža stare město spěšnje restawrować, tak, zo móžachu po 1990 poměrnje chětř z tym započinać, spěš­nišo hač druhe města. Loni běše Weber nachwilnje tež twarskeho měšćanostu zastupował, jako bě tuta pozicija wa­kantna.