Domizniski dźeń je mjeztym jedna z tradicijow w běhu lěta ewangelskich Serbow we Wojerecach. Prěni raz su jón 2007 wuhotowali. Na lětuši 16. domi­zniski dźeń přeprošuja 18. awgusta do Čorneho Chołmca.

Wojerecy/Čorny Chołmc (AK/SN). „Serbske žiwjenje skrućić, tutu zakładnu ideju měješe farar Joachim Nagel 2007“, rjekny Sigrun Nasdalina. Wón chcyše zhromadnosć přisporjeć z „jasnym wuznaćom k serbskim korjenjam Wojerowskeho regiona“. Sigrun Nasdalina angažuje so w přihotowanskim kruhu, kotryž so kóžde lěto do domizniskeho dnja schadźuje. Kruhej 22 čłonow přisłuša, fararki a fararjo, zastupjerjo wosadnych radow kaž tež Domowiny.