Serbski zapósłanc sakskeho krajneho sejma Marko Šiman je swoje wuradźowanje ze zastupjerjemi komunow wólbneho wokrjesa zjawnosći wotewrěł. Do jědźernje wyšeje šule we Wulkej Dubrawje je sej srjedu tež sakski statny mi­nister za nutřkowne Armin Schuster (wobaj CDU) dojěł.

Wulka Dubrawa (WL/SN). W połnje wobsadźenej jědźerni wozjewi tři tydźenje do wólbow do sakskeho krajneho sejma minister bilancu, kotraž z jeho wida „scyła tak špatna njeje“. Wšitke zakonske naćiski jeho ministerstwa su wobzamknjene. Mjez druhim je to zakoń wohnjoweje wobory a policije, kotryž pyta po cyłej Němskej runjeća.

Ćežišća wječora běchu wohnjowa wobora, nutřkowna wěstota a sport. Minister skedźbnješe na to, zo dyrbja so spěchowanske regulacije dale wjesć a zo su so nic naposledk konsekwentnosće Sakskeje dla namjezne kontrole zesylnili kaž tež zapłaćenske kartki za wo azyl prošacych po cyłej Němskej zawjedli. Nětko dyrbjało so z tym postupować, ludźi ­do swojich ródnych krajow wróćo słać a wotsunjenje skućićelow do Syriskeje a Afghanistana přesadźić.