Biskopicy (UM/SN). Wjele ludźi je so za wobstaće socialneho zarjadnišća, kotrež so wo zežiwjenje potrěbnych stara, zasadźowało. W aprylu lěta 2024 hižo je regionalny zwjazk Towarstwa demokratiski zwjazk žonow we wuchodnej Sakskej w zjawnosći na prekernu situaciju Biskopičanskeje tafle – ale tež mnohich dalšich socialnych zarjadnišćow kaž socialneje kupnicy w Biskopicach a w Žitawje – skedźbnił.
Što běše so stało? „Naš běrow za knihiwjednistwo je financielne njeregularnosće zwěsćił“, rozłožowaše tehdy nawoda Biskopičanskeje tafle Ferenc Radocha w rozmołwje z regionalnej nowinu. Zamołwitosć za tute „njeregularnosće“ měješe tehdyša jednaćelka Regionalneho zwjazka Sakskich taflow. Jej su w tym zwisku wupowědźili. Po sudniskim jednanju w juniju, w kotrymž so wobě stronje dojednałoj njejstej, pak zdźěli nowy jednaćel zwjazka Stephan Trutschler, „zo je so wo to postarał, zo so Biskopičanskej tafli pjenjezy wróćo přepokazaja. Z tym steji wona zaso na financielnje wěstym zakładźe“.
