Z wosebitej akciju chcedźa we Wojerecach serbšćinu w zjawnym rumje sylnić

Wojerecy (AK/SN). Město Wojerecy chce serbsku rěč w zjawnych rumach dale zesylnić. Wuraz toho je iniciatiwa, w kotrejž chce dohromady 60 dwurěčnych nalěpkow z napisom „Witajće k nam! Herzlich Willkommen!“ na wobchody, lěkarske praksy, starownje abo druhe zarjadnišća w měsće kaž tež we wokolinje rozdźělić. Wojerowska přirada za serbske naležnosće a kruh pře­mysła Přichod Wojerecy stej akciju z podpěru Wojerowskeje župy Domowiny organizowałoj.

„Serbsku rěč wožiwić a spěchować, je nam naležnosć wutroby“, podšmórny Wojerowska předsydka serbskeje přirady kaž tež přirady za zbrašenych Evelin Graf na nowinarskim terminje wutoru we Wojerowskej turistiskej informaciji. Symbolisce běchu tam hižo prěni nalěpk na zachodne durje nalěpili. Cyłkownje je město za dohromady 40 běłych kaž tež 20 šěrych nalěpkow ze serbskim lipowym łopješkom něhdźe 1 000 eurow wudało.