W lěće 2014 je Ludwig Sachsa w swojim lěsu ideju na dobro dźěći a młodostnych zwoprawdźił: Lěsny park. Přichod woblubowaneje idylki je nětko njejasny – wandalizma dla.

Radwor (SN/MiP). Radworčan Ludwig Sachsa je jara aktiwny wuměnkar. Za swoje čestnohamtske dźěło je jeho zwjazkowy prezident Frank-Walter Steinmeier lětsa w januarje samo wuznamjenił. Hižo 17 lět nawjeduje dźěłowe zjednoćenstwo, w kotrymž pasli a twari ze šulerjemi Radworskeje šule z drjewom.

Dalši projekt na dobro dźěći běše Lěsny park, kotryž je před třiceći lětami w swójskim lěsu mjez Radworjom a Chasowom z wjele prócu a wutrajnosću lěto wob lěto natwarił a dale wutwarił. Spočatnje ze swójskimi financielnymi srědkami, pozdźišo tež z podpěru sponsorow, je tu prawe přirodne lěsne hrajkanišćo kaž tež domiznowědne kubłanišćo nastało. Nimo ławkow a budkow z drjewa, čumpjelow a ptačich kupjelow je tu ze šulerjemi informaciske taflički wo fawnje a florje w lěsu připrawił. W lěće 2014 potom je Ludwig Sachsa „Lěsny park“ hromadźe z Radworskej šulu a gmejnu oficialnje wotewrěł.