Budyšin (CS/SN). Hudźbno-literarnemu wječorkej z titulom „Lubosć nade wšitkim“ bych wjace publikuma popřała. ­Jenož něhdźe 30 hosći běše sobotu do Budyskeho młodźinskeho zetkawanišća TiK přišło. Wuměłsce wuhotowała je zarjadowanje skupina LAAWA. Njewšědne mjeno su čłonojo hudźbneho cyłka z prěnjeho pismika swojich předmjenow stworili: ­spěwarka Luise Wizisla, pianistka Anja Konjen, basist Alban Konjen, bubnowar Wenzel Konjen a basnik Andreas Hennig ze swojimi lyriskimi kaž tež z tekstami prozy. A na swojej hubnej harmonice je wón někotrejžkuli pěsni přidatnu hudźbnu fasetu spožčił. Bratraj Wenzel a Alban Konjen staj synaj pianistki Anje Konjen. Ze swojim hudźbnym talentom staj ­wobaj hižo jako chowancaj Budyskeje wokrjesneje hudźbneje šule na so skedźbnjałoj, hdźež jeju mać tež hraće na kla­wěrje wuwučuje.