Słona Boršć (UM/SN). Na industrijowej přestrjeni Budyšin-Słona Boršć so tuchwilu na wjacorych městnach twarske krany wjerća. Tak twaritej Drježdźanske předewzaće ABG a firma Prosperplast nowe hale za skład, logistiku a zarjadnistwo. Předewzaće ABG bu w lěće 2015 w Drježdźanach załožene, hdźež ma swoje sydło. Wone twari a předawa připrawy, z kotrymiž hodźi so woda rjedźić. Nadawki dóstawa firma wot Łužiskeje a srjedźoněmskeje towaršnosće hórnistwoweho zarjadnistwa (LMBV) a wot Sakskeho krajneho zarjadnistwa spjatych jězorow. Dale skutkuje firma při hladanju rěkow kaž tež jězorow a twari studnje.

Kaž z předłohi Budyskeje měšćanskeje rady wuchadźa, je ABG ležownosć pódla firmy Ionisos spočatk lěta 2021 kupiła. Tehdyši plan bě, do zarjadniskeho twarjenja z integrowanym składom 5,5 milionow eurow inwestować. Na stejnišću w Słonej Boršći chce předewzaće ABG technologije a recycling twaršćiznow wuwiwać a swoje aktiwity na polu geo­thermije stopnjować.