Zajimcy a fachowcy na solarnej party w Zejicach do rozmołwy přišli

Zejicy (SN/MWj). Na mnohich třěchach w serbskich wsach hižo fotowoltaikowe připrawy wuhladaš. Druhe třěchi su hišće „nahe“, bychu pak dobre městno skićili, na nich milinu produkować. Wjace hač 20 mějićelow wobeju skupin je so wčera w Zejicach zešło. Na tamnišim Wjeselic ratarskim statoku stej towar­stwje Ostsachsen wechselt a VEE Sachsen tak mjenowanu solarnu party organizowałoj. Bě to mjeztym hižo 21. w swo­bodnym staće. Wčerawša je předewšěm serbskich zajimcow přiwabiła. „Runje tu smy zwěsćili, zo je wjele wulkich twa­rjenjow z wotpowědnymi třěchami, na kotrychž hodźała so solarna technika ­instalować“, praji Ronny Böhme, kotryž je zetkanje sobu přihotował.