Impresije na kromje mjeztym 4. Slawijamarša po serbskim kraju

W Hórkach bě zašłu sobotu start a cil 4. Slawijamarša, na kotrymž je nimale 300 ludźi 50 kilometrow po serbskim kraju pućowało. Weronika Žurowa je po puću někotre impresije zapopadnyła.

Najzašo drje su sobotu rano Hórčanske žony stawali, zo bychu wot 20 chlěbow słódne pomazki za nimale 300 startowacych Slawijamarša namazali. Ćělne derjeměće dźě bě za pućowacych zakładne wuměnjenje, zo bychu w běhu dwanaće hodźin do cila doběželi.

Po lěsach a mjez polemi wjedźeše puć z Hórkow přez Ralbicy a Koćinu do Sulšec, hdźež bě w młodźinskim klubje prěnja přestawka. Team kołowokoło hłowneho organizatora Mateja Wjeńki so tule kaž tež na dalšimaj stacijomaj w Serbskich Pazlicach a we Wotrowje wulkotnje wo to staraše, zo je wot přikuskow a napojow hač k čistym nuznikam wšo spřihotowane. „Při zestajenju čary smy hladali, hdźe su młodźinske kluby, w kotrychž móžemy zastaranske stacije zarjadować, zo njebychmy trjebali wulke rumnosće abo žurle za to wotnajeć“, wón powěda.