Wojerecy (KD/SN). Podlěšena připołdniša přestawka na Wojerowskej wyšej šuli je wosebity projekt, kiž drje swojeho ­runjeća pyta. Wšědnje po wobjedźe ­wopytuje kóždy šuler kurs a zeznawa tak poskitki firmow, towarstwow, zarjadnistwow a wólnočasnych poskićowarjow z města a blišeje wokoliny, rozprawja 15lětny Sam. Wot spočatka meje hač do kónca šulskeho lěta wobdźěla so wón hromadźe z dalšimi šulerjemi 7. do 9. lětnika na kursu „Radnica na wopyće w šuli“. W tymle wobłuku běštaj mjez druhim šef hospodarskeho spěchowanja Christian Hoffmann a Marco Bloch z teama za strukturnu změnu w šuli a wo swojim dźěle rozprawjałoj.

Tutón tydźeń wopytaštaj šulerjow zamołwita za serbske naležnosće města Diana Karbowa a student powšitkowneho zarjadnistwa Pascal Stallerscheck. Diana Karbowa spěchuje w měsće serbšćinu a kulturu, přijimuje naležnosće wobydlerjow nastupajo serbšćinu a stara so mjez druhim sobu wo to, zo bychu zjawne twarjenja w měsće tež serbske napisy měli. Na prašenje, kak je k swojemu zastojnstwu přišła, wona wotmołwi: „Měšćanska rada je mje wuzwoliła.“