Njeswačidło (CS/SN). Byrnjež wjedro wčera, swjatki póndźelu, najpřijomniše njebyło, su zaso tysacy ludźi k wětrnikam a młynam putnikowali. Wosebje krasny napohlad skići wětrnik, kotryž blisko zwjazkoweje dróhi B 96 mjez Łuhom a Chasowom steji. Sćerpliwje wopytowarjo čakachu, zo móhli sej wětrnik dokładnje wobhladać, kotryž bu něhdy wot Zarěča na dźensniše městno přesadźene. Kóžde poł hodźiny přewjedźechu organizatorojo tam wodźenje. Tež tak mjenowany dom kata móžachu hosćo wobdźiwać. Z pomocu fachowcow su jón čłonojo towarstwa Přećeljo kultury a domizny Njeswačidło w Lišej Horje wottwarili a na ležownosć wětrnika přesadźili. Tak stej njedaloko Chasowa nětko dwě zajimawostce na jednym městnje. Tež w domje kata wčera wodźenja poski­ćachu. Za to běchu domizniscy přećeljo samo wěcywustojneho wo podpěru prosyli: Anton Stehle bě z bayerskeho Wertingena přijěł, zo by swojeho Njeswa­čanskeho kolegu zastupował. Stehle je horliwy hobbyjowy stawiznar a wjedźe w swojim ródnym měsće Wertingenje zajimowanych na slědach mordarstwa a zabiwanja.