Chrósćicy. Po wjele měsacach přihotowanja započnje so srjedu, 11. junija, swjedźenski tydźeń 800. róčnicy Chróšćanskeje wosady a gmejny. Tón dźeń w 17 hodź. předstaja šulerjo serbskeje zakładneje šule Chrósćicy w Jednoće musical „Pupk swětnišća“. Nazajtra, 12. junija, w 19 hodź. změje w Ludowym nakładnistwje Domowina wušła kniha „Chrósćicy – wosada, wjeski, žiwjenje“ premjeru na Krawčikec žurli. 13. junija we 18 hodź. wotměje so wubědźowanje wohnjowych woborow na nawsy. W 20 hodź. swjedźenski tydźeń oficialnje zahaja a wobornikow-dobyćerjow mytuja. Po tym budu reje z kapałomaj Šwintuchi a Holaski.

Sobotu, 14. junija, přeprošuja wot 13 hodź. na dźeń rjemjesła w Chrósćicach a Prawoćicach. W samsnym času započnje so historiske wjedźenje po Chrósćicach. Start je při swjedźenskim stanje. Tam budźe wot 16 hodź. kulturny program. Wječor zahraja Horjenjo a Chróšćanscy muzikanća k rejam. Njedźelu po kemšach přeprošuja wot 11 hodź. na rańše piwko. W 13.30 hodź. započnje so swjedźenski ćah.