Němcy (KD/SN). Wot lěta 2024 wobdźěla so Němcy na wubědźowanju „Naša wjes ma přichod“. Mjeztym je wjes jenička serbska, kotraž je w sakskim krajnym wubědźowanju zastupjena. Krótko do swjatkow je jury wjes wopytała. Něhdźe 70 wobydlerjow wšitkich starobnych skupin měješe tři hodźiny chwile, wjesne žiwjenje w běhu lěta wot camprowanja přez rockowy koncert hač k swjatemu Mikławšej předstajić.

Holcy a hólcy předšulskeje skupiny Witaj-pěstowarnje „Pumpot“ jurorow w drasće katolskich Serbow z chlěbom a selu witachu. Kaž nawodnica Jana Mejglowa rjekny, dźěći w pěstowarni serbske basnje, reje a pěsnje nawuknu. Čim wjace rěčow wone rěča, ćim lěpje ludźi z druhich rěčnych a kulturnych kruhow akceptuja, Jana Mejglowa rozłoži. W Němcach samych zwuraznjatej serbska a němska kultura wosebitu identitu wsy, kotruž chcedźa zhromadnje zachować.