Składnostnje 800. róčnicy Malešec zarjaduja wosebitu wustajeńcu

Malešecy (UM/SN). Mjez mnohimi městami a wsami Hornjeje Łužicy, kotrež lětsa 800. róčnicu swjeća, su tež Malešecy. Hinak hač w Kamjencu a wokolinje pak njepoćahuja so tam na wopismo klóštra Marijineje hwězdy. Přiwšěm ma tež najstarše pisomne naspomnjenje Ma­lešec cyrkwinski pozadk. „Jedna so wo postajenje wotedawka biskopej“, rozjasnja Iris Brankačkowa. Wona bydli w susodnych Plusnikecach a so hižo wjele lět z tamnišimi stawiznami zaběra. „Při tym sym tež mnoho informacijow wo Malešecach nazběrała“, wona rozprawja. „Jako wo přihotach na 800. róčnicu Malešec zhonich, so rozsudźich, swoje dopóznaća za to přewostajić.“