Radwor (SN/ VaŽ). Swjedźenski tydźeń w Chrósćicach so njedźelu z Božim ćěłom zakónči. Po Božej mši, kotraž započnje so w 9 hodź., w swjedźenskim stanje wšitkim zhromadny wobjed poskića. Wawrikec catering z Radworja so wo ćělne derjeměće hosći stara. Team cateringa podpěruje něhdźe dźesać pomocnikow. Přidatnych pomocnikow wotpowědnje zapokazaja, zo by pohosćenje bjez problemow wotběžało. K jědźi chcedźa hosćom tradicionalnu serbsku kwasnu poliwku, howjaze mjaso z chrěnom a za dźěći kołbasku poskićeć. Najwjetše wužadanje budźe logistika, wšako dyrbi so wšitko w samsnym času wotměć: W běhu dweju hodźin chcedźa něhdźe 500 ludźi zastarać. Tola za mějićelku Radworskeho hosćenca „Meja“ Katleń Wawrikowu, njeje to wuwzaće. „Tajke mnóstwa ludźi z jědźu zastarać słuša k mojemu wšědnemu dnjej. Druhdy warimy za hač do tysac ludźi“, wona praji. Nimo warjenja pak ma so tójšto dalšeho wobmyslić: „Dyrbiš so wo dosć jědźneho grata starać, wotběh předawanja eficientnje planować, kasěrarki rozdźělić a dalše maličkosće wobkedźbować.“ Zarjadowarjo liča z hač do 600 wopytowarjemi.