Potrjeba na komunalnych bydlenjach we łužiskich gmejnach rozdźělna

Budyšin (SN/MiP). Bydlenja w Němskej su lěto a požadniše a z tym tež podruže za wotnajerjow dale a bóle stupaja. Mamy prosće přemało bydlenjow. Po statistice Instituta němskeho hospodarstwa (IW) je přerězna podruž w Němskej loni w poslednim kwartalu wo 4,7 procentow porno předlětu stupała. Po statistice portala za přirunanje podružow www.mietpreise.info płaća wotnajerjo tuchwilu w Sakskej přerěznje 7,18 eurow podruže na kwadratny meter.

„Turbo za twar bydlenjow“ rěka plan noweje twarskeje ministerki Zwjazka Vereny Hubertz (SPD), kotryž je kabinet minjenu srjedu schwalił a z kotrymž chce Němske knježerstwo tutomu wuwiću zadźěłać. Mjez druhim chcedźa procesy planowanja a přizwolenja zjednorić – wosebje tež we wobłuku socialnych bydlenjow. Lětsa w nazymje ma parlament naćisk zakonja schwalić.