Dobrowólne wohnjowe wobory su na wsach a w městach njeparujomny wobstatk zjawneho žiwjenja. Ludźo móža so na to spušćeć, zo jim něchtó pomha, hdyž su w nuzy. Za to dyrbja wobornicy stajnje derje wukubłani być a sej trěbne znajomosće přiswojeć.

Slepo (JR/SN). W nowej gratowni Slepjanskeje dobrowólneje wohnjoweje wobory su minjeny kónc tydźenja prěnje wukubłanje w techniskej pomocy přewjedli, a to z wulkim wuspěchom. Tak mjenowany zakładny kurs A we wobłuku wokrjesneho wukubłanja su žony a mužojo z wjacorych wsow wopytali. Wobdźělili su so mjez druhim kameradojo z Trjebina, Slepoho, Krynhelec a Rownoho. Mjez nimi běchu tři žony. Wone přeswědčachu ze swojimi předznajomosćemi runje tak kaž ze swojim angažementom.