Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (6)
W Njeswačidle běchu ludźo stajnje hižo wot wulkeje wody a zahubnych wohenjow wohroženi. Zo móhli woheń systematisce hašeć, mějachu tam w měrcu 1880 hašenske mustwo, wobstejace z 13 muži. Wuhotowani běchu z uniformu a nahłownikom. Jako swojeho nawodu powołachu kowarskeho mištra Augusta Möhle. W slědowacych lětach stupaše ličba dobrowólnych pomocnikow wo dalšich dwanaće na cyłkownje 25. Woni wukmanichu so w postupowanju při hašenju, tak zo wobhladuja 1888 jako lěto załoženja dobrowólneje wohnjoweje wobory w Njeswačidle. Samsne lěto dóstachu wobornicy za tehdyši čas modernu šprycu a zastupichu do Zwjazka łužiskich woborow. Šprycu ćehnjechu konje, klumpać dyrbjachu wobornicy sami. Ćišć dosahaše, zo móžachu wodu hač na třěchu hrodu pryskać.
