Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (8)

Wjacekróć wob lěto su w serbskich wsach wubědźowanja wohnjowych woborow. Nimale wšudźe wobdźěluje so mustwo wohnjoweje wobory ze Sulšec pola Kulowa. Dokelž wobstajnje pilnje zwučuja, wědźa dokładnje, hdźe swojich kameradow najlěpje zasadźuja. Tole wobkruća nawoda Sulšečanskeje wohnjoweje wobory, 35lětny hašenski mišter Aleksander Michałk. Mjeztym wón štwórte lěto tule funkciju wukonja.

Wón je so tež ze stawiznami wobory zaběrał. Załožili su cyłk w lěće 1934. ­Často běchu tež w Sulšecach zahubne wohenje kaž powodźenja. Tohodla trjebachu w tajkich padach wobsadku, kotraž wurjadnje ludźi wuchowa. Runje tak wažne pak bě tež škit a zachowanje skotu kaž tež materielnych wěcow. Wězo dyrbjachu mužojo tež derje woheń hašeć ­respektiwnje na předpisy kedźbować, zo njeby woheń scyła hakle wudyrił.