Kamjenc (SN/MWj). „Wustajeńcu „800 lět – što Kamjenc a Kamjenčanow jima“ wotewru pjatk, 15. awgusta, w 19 hodź. w Kamjenskej měšćanskej bibliotece „G. E. Lessing“. Historikar dr. Lars-Arne Dannenberg poda zawod wo wubranych podawkach měšćanskich stawiznow. Digitalne wobrazy z krótkimi informacijemi budu potom hač do 21. nowembra w zachodźe biblioteki we wotewrjenskim času widźeć, rěka w nowinskim wozjewjenju biblioteki. Nimo toho pokazaja pjeć motiwow fotografa Waltera Steinborna (1927–2011).
Měšćanska biblioteka měješe z Kamjenskim stawizniskim towarstwom a ze spěchowanskim towarstwom biblioteki angažowaneju partnerow poboku, z kotrymajž wjacore poskitki zwoprawdźi. Nimo wustajeńcy su štyri přednoški organizowali. Dale zestajichu brošurku, kotraž budźe wot 16. awgusta w bibliotece na předań. W 84 stron wopřijacym zešiwku wjedu tematiske přinoški po Kamjenskich stawiznach a wyši měšćanosta Roland Dantz zwaži sej wuhlad na 900. róčnicu města.
