Modele awtow, motorskich, traktorow a druhich jězdźidłow wjele ludźi fascinuje. Štóž so porno tomu za modele lětadłow zajimuje, njech sej srjedź awgusta do Narća pola Wojerec dojědźe.

Narć (AK/SN). Swětowe mišterstwo modelowych lětadłow klasy F3B přewjedu bórze na Narćanskim lětanišću pola Wojerec. Wot 10. hač do 15. awgusta startuja tam wobdźělnicy z 13 krajow – mjez druhim z Němskeje, USA, Chile, Japanskeje a Awstralskeje. Po lěće 2013 towarstwo Aeroklub Wojerecy swětowe mišterstwo druhi raz wuhotuje. „Z tym nawjazamy na swoje dobre nazhonjenja. Přiwšěm pytamy dale pomocnikow, kotřiž so wo hosći a wo wubědźowanišćo staraja. Tohorunja pytamy sponsorow“, praji sobu organizator a bywši předsyda towarstwa Roland Pietsch.