Hižo w 1960tych lětach su we Wojerowskim nowym měsće z hotowych modulow bydlenske domy twarili. Tehdyši eksperiment pak njejsu dale slědowali. Nětko twarja w měsće na podobne wašnje šulske twarjenje.

Wojerecy (KD/SN). Wojerowsku wyšu šulu tuchwilu rozšěrjeja. Tam nastawa přidatne twarjenje, nic pak z kamjenjow abo cyhelow, ale z hotowych modulow. Te zhotowja předewzaće Kleusberg w Kabelsketalu pola Lipska. Sydło předewzaća pak je w sewjerorynsko-westfalskim Wissenje­. Wot wutory tohole tydźenja su module w nocy do Wojerec přiwjezli. Wodnjo je na twarnišću kubłanišća zmontowachu, a to jenož šěsć tydźenjow po tym, zo bě symboliski prěni zaryw a zo běchu zakładnu betonowu platu zhotowili.