Mułkecy (AK/SN). Slepjanski wětrnikowy park, dźělny projekt předewzaća ROMUS­ energija a inowacija, so poněčim zwoprawdźa. Tole je Slepjanski wjesnjanosta Jörg Funda (CDU) zdźělił. „Za prěni twarski wotrězk ze štyrjomi milinowymi wětrnikami na Mułkečanskim nasypje nětko dowolnosć předleži. Wot nazymy 2025 ma so tam twarić“, wón w aktualnej gmejnskej nowinje Slepjanskeho zarjadniskeho zjednoćenstwa rozprawja. Za druhi wotrězk jednanje wo twarsku dowolnosć hišće traje. Wón wopřijima 17 dalšich wětrnikow.

Wšitke posudki a podłožki su zapodate, tak wjesnjanosta. Delni zarjad za škit emisijow Zhorjelskeho wokrjesa je tuchwilu pruwuje. Mjez druhim zarjad zawěsća, zo so wšitke wobswětoškitne předpisy dodźerža. Nimo toho wokrjes dalše fachowe zarjady zapřija. Mjez druhim je to zarjad za přirodoškit. Tež jeho pokiwy maja so wobkedźbować. Hakle potom móže so projekt dowolić. Po słowach wjesnjanosty chce Slepjanska gmejna wobydlerjow wobstajnje wo dalšich krokach informować.