W mnohich wsach je z wjelelětnej tradiciju, wuhotować wjesny swjedźeń. Tak tež w Róžeńće. Lětsa rozsudźichu so tam za trochu mjeńšu wariantu, při čimž steješe sport w srjedźišću.

Róžant (DŠ/SN). Wjesna zabawa w dowolowym času? To drje je wužadaca, ale nic njemóžna wěc. Tak zwažištej so Róžeńčanski młodźinski klub a tamniše wjesne towarstwo na zhromadny dyrdomdej. Pjatk zahajichu swjedźeń z wubědźowanjom dźewjeć mustwow dobrowólnych wohnjowych woborow wo pokal. Po spěšnych bojach smědźachu so Smjerdźečenjo jako rjekojo swjećić dać. Hač do nocy přizamkny so wjesoła bjesada. Přijomne wjedro bě syłu hosći na swjedźenišćo při putniskej łuce přiwabiło.