Hans Jürgen Rohe je wot lěta 2014 na jězbny stoł pokazany

Něhdźe 6 000 (!) kilometrow jědźe Hans-Jürgen Rohe (65) wob lěto na kolesowarskich šćežkach po cyłym kraju. ,,Po Łužiskej jězorinje jědu prěni raz. Ludźo su jara pomocliwi a wotewrjeni. Na nowych a šěrokich šćežkach je samo móžno porno sebi jěć“, měni rodźeny Dortmundźan, kiž bydli dźensa w Siegburgu. Dokelž je na boreliozu schorjeł, sedźi hižo wot lěta 2014 w jězbnym stole. W nadawku wšelakich turistiskich zwjazkow wón dowolowe kónčiny na bjezbarjernosć testuje. Łužiska jězorina je dźěl toho.

„Smy sobustaw w dźěłowym zjednoćenstwje ‚Lochko pućować‘. Tam je wjace hač dźesać regionow zastupjenych, mjez druhim tež Sakska Šwica. Spěchujemy a skrućamy wuwiće turizma bjez barjerow a so za njón zasadźamy“, praji Therés Wurzler, projektowa koordinatorka syće „Pućowanje bjez barjerow“ w turistiskim zwjazku Łužiska jězorina. „Za partnerow z praksy, kaž blogera Hansa-Jürgena Rohe, smy jara dźakowni.“