Kak je so napis „Maršal Konjew“ wot Ralbičanskeje šule zhubił

W stawiznach Ralbičanskeje noweje, mjeztym poł lětstotka wobstejaceje šule, je so zakorjeniła wopačnosć: „Čestne mjeno ‚Maršal Konjew‘ bu w nócnej akciji wot šulskeho twarjenja wotstronjene“. Tule wopačnosć su dožiwili swój čas wšědnje do šule přichadźacy wučerjo. Mjez nimi bě na přikład w Kamjencu bydlacy wučer matematiki Jurij Šołta. Za rozeznawanje wot Jurja Šołty Nowowješćanskeho, kiž wuwučowaše serbšćinu a rušćinu, rěkaše tón druhi Jurij Šołta Kamjenski­ abo mate-šołta.

Woprawdźitosć

Wone popołdnjo, jako so tón „njeskutk“ na šulskim twarjenju wotměwaše, dźěłach doma w zahrodźe. Njedopomnju so hižo, kak běch wo tym zhonił. Wostajiwši wšeho wzach swoju kameru a doběžach k šuli. Tam nańdźech „hrěšnikow“ při jeju „njeskutku“. Běštaj to šulski domownik Józef Wowčerk (dawno njebohi) a wjesnjan Jurij Wjesela – wobaj wušiknaj na wšě móžne rjemjeslniske ručne dźěła. Wotstroništaj mjeno wot fasady šule.