W Hodźiju poswjeća přichodnu sobotu wopomnjensku šćežku na česć serbskeho ludoweho basnika Pětra Młónka, kiž je so před 220 lětami w Žičenju (Seitschen) narodźił. Iniciator projekta je 81lětny Gerat Krawc z Delnjeho Wunjowa.

Hodźij (SN/MiP). Na kěrchowje ewangelskeje wosady w Hodźiju je serbski ludowy basnik Pětr Młónk pohrjebany. Wón bě so 19. měrca před 220 lětami jako syn žiwnosćerja a ćěsle w Žičenju narodźił. Čas swojeho žiwjenja je w Hodźijskej gmejnje a wosadźe žiwy był a skutkował. Pětr Młónk je wjace hač 1 000 serbskich spisow a basnjow zawostajił. Wón běše čestny čłon Maćicy Serbskeje a přećel wudawaćela Serbskich Nowin Arnošta Smolerja.