Radwor (SN/MiP). Srjedu wječor witaše Radworska wjesnjanostka Madeleine Rynčowa lětsa posledni raz gmejnskich radźićelow na jich posedźenje. Hłowny dypk na dnjowym porjedźe běše bjezdwěla předstajenje a schwalenje nowowolenych nawodow Minakałskeje dobrowólneje wohnjoweje wobory. Mjez nimi běše tež nowy nawoda młodźinskeje wohnjoweje wobory Nico Wagner, tuž staj tež młoda kameradka a młody kamerad na posedźenje přichwatałoj. Wonaj­ rozprawještaj mjez druhim wo „prawych demokratiskich tajnych wólbach“, w kotrychž běchu młodostni zašły měsac noweho, z Baworskeje pocha­dźaceho 39lětneho nawodu wolili.