Kak po lětsa wupadnjenym wjeršku klětu dale póńdźe, hišće wěste njeje

Budyšin (SN/mb). 642. Wjacławske wiki su nimo, a tež zamołwići w Budyskej radnicy móža sej po lětušich wótrych rozestajenjach tróšku hodowneho měra popřeć. Wjeršk konfliktow bě namjet, wyšeho měšćanostu Karstena Vogta (CDU) wotwolić, za čož drje wjetšina měšćanskich radźićelow hłosowaše, trěbny kworum třoch štwórćinow pak njedocpě. Prěni podawk w rjedźe nazymskich zwadow běše wotprajenje woblubowaneho nakupowanskeho a dožiwjenskeho wječora „Romantici“, kiž hižo běrtlk lětstotka w sprjewinym měsće přewjeduja. Loni je event połsta tysac ludźi wopytało, mjez nimi mnozy Serbja, a tež Serbska kulturna informacija běše zapřijata. Naš wječornik chcyše wot měšćanskeho zarjadnišća wědźeć, kajke su wuhlady, zo so Romantica klětu zaso wotměje.