Cyrkwinski chór z hosćimi hodowny nyšpor wuhotował

Chrósćicy. Prěnja njedźela noweho lěta je w Chrósćicach hižo wjele lět kruty termin, na kotrymž tamniši cyrkwinski chór zhromadnje z dalšimi hosćimi hodowny hudźbny nyšpor wuhotuje. Wčera bě wjele ludźi mjez druhim z Pančic, Smječkec, Worklec a Chrósćic do wosadneje cyrkwje přichwatało, tak zo bě Boži dom wospjet derje pjelnjeny. Mjeztym zo wonka wětřik po zasněženej krajinje duješe, dožiwichu wopytowarjo w cyrkwinych ławkach sedźo hodźinku dušineho wokřewjenja.

Po zhromadnym kěrlušu „Słyšće powěsć“ na tekst Měrćina Salowskeho zanjese něhdźe 40 spěwarkow a spěwarjow cyrkwinskeho chóra pod nawodom Michała Cyža koledy z čěskeho hodowneho cyklusa Miloša Boka (nar. 1968). Spěwarki a spěwarjow přewodźeše na pišćelach z Dobranec pochadźacy organist Jo­hannes Kral. Jeho njeje publikum jenož słyšał, ale dźakowano widejowej sćěnje, kiž prědku we wołtarnišću steješe, tež ­widźał. Slědowaše zhromadny kěrluš „Pastyrjo słyšće“, kiž wosadni z přewodom chóra, pišćelow a dujerjow pod nawodom Jurja Jakubaša zaspěwachu.