Slepjanska gmejna nadźija so spěchowanja z noweho programa
Slepo (AK/SN). Dom sportoweho towarstwa Lok Slepo ma so wobšěrnje přetwarić a modernizować. Za to ma so gmejna wo spěchowanske srědki z programa Zwjazka za saněrowanje komunalnych sportnišćow prócować. Tole je wjetšina gmejnskich radźićelow na swojim wčerawšim posedźenju wobzamknyła. Podłožki dyrbja hač dosrjedź januara zapodać. Předewzaće ma něšto wjace hač tři miliony eurow płaćić.
Dotalne twarjenje ma dalše rumnosće za předrasćenje a dalekubłanja dóstać. Sanitarne rumnosće maja hišće standard z časa NDR. Wopytowarjo je runje tak wužiwaja kaž hrajerjo. Nětko ma so cyły sanitarny wobłuk ponowić, Denis Kisza z předsydstwa sportoweho towarstwa rozłoži. Po jeho słowach so hižo tři lěta z projektom zaběraja. Mjeztym su studiju zhotowić dali, kak hodźał so dom přetwarić.
