Rowno (JoS/SN). Z hodami na dworje a z wupósłanjom měroweho swětła je so loni na předwječoru štwórteho adwenta rjad zarjadowanjow spěchowanskeho towarstwa Njepilic statoka w Rownom skónčił. Hišće raz su tam tójšto wopytowarjow zličili.

Dypkownje předleži zdobom přehlad zarjadowanjow za lěto 2026. Sobotu, 17. januara, wuhotuja jako prěni wjeršk lěta swinjorězanje, a to mjeztym 25. raz. Chłóšćich hubow drje budźe znowa dosć. Dalše wjerški su w februaru pjerjodrěće, jutry pěstuja serbske tradicije kaž jutrowny nyšpor na Rownjanskim kěrchowje a woblubowane molowanje jutrownych jejkow w swójbje ćichi pjatk. Na Rownjanske rańše piwko přeprošuja 14. meje. Wosebitosć tohole zarjadowanja je, zo tam wjesna šalmajowa kapała program wuhotuje. Nimo njeje wustupi Grodkowska dujerska kapała, kotraž ma mjeztym wjace hač 40 serbskich hudźbnych titulow w swojim repertoiru. Hdyž hudźba zaklinči, knježi přeco dobra nalada.