NSLDź wuběr kostimow ze swojeho fundusa zajimcam poskićiło

Budyšin (CS/SN). Sobotu a njedźelu je fundus kostimow Němsko-Serbskeho ludoweho dźiwadła přećahnył, mjenujcy wot jednoho boka Burskeje hasy na tamny, hdźež je probowe jewišćo. Na garderobowych rjadach wisachu lacy, bluzy, kapy, šaty a wjele dalšeho. W druhej rumnosći běchu najwšelakoriše rekwizity nastajene a wupołožene, tohorunja po wěstych wobłukach rjadowane: črije, kłobuki, čapki, rubiška, šawle, toboły, debjenki a njeličomne dalše wěcy. Jónu wob lěto zarjaduje NSLDź kostimowe čaporowe wiki. Lětuše wotměchu so najebać škodu, kotruž je krótko do toho woda na jewišću naparała.