Wuběrk Domowiny za dom Měrćina Nowaka-Njechorńskeho wuradźował

Budyšin (SN/mb). Wuběrk Zwjazkoweho předsydstwa Domowiny za „Dom Měrćina Nowaka-Njechorńskeho“ je so wčera nawječor w Budyskim Serbskim domje zešoł. Kaž referent za kulturu třěšneho zwjazka, Clemens Škoda, kiž wuběrkej sam jako wěcywustojny a zastupjer zarjada přisłuša, zjawnosć informowaše, běše hłowna tema wuradźowanja, kak móhli w přichodźe ležownosć w Njechornju wužiwać. Za to trjebaja koncepciju.

Załožba za serbski lud bě loni trěbne srědki za saněrowanje domu sławneho serbskeho molerja, grafikarja, publicista a spisowaćela Měrćina Nowaka (1900– 1990) krótkodobnje k dispoziciji stajiła, zo by dale wobstał. Na twarnišću dźe ­nětko wo to, škódniki wotstronić, kotrež cyłe drjewo wohrožuja. Ródny dom Měrćina Nowaka bu zjawnosći 1999 jako ­muzej přepodaty. Ležownosć z domom a ateljejom bě wuměłc Domowinje z přećom wotkazał, tu zarjadować muzej a serbske kulturne schadźowanišćo. Kaž tehdom je nětko zaso ponowjenje trěbne, zo bychu tute herbstwo pěstowali.