Časowi swědkojo a jich potomnicy su hladajo na intensiwne rozestajenje ze stawiznami NS-knjejstwa njeparujomni. „Wobchowajmy sej jich přeco w pomjatku“, podšmórny iniciatorka projekta ze šulerjemi Helga Nickich zawčerawšim we Wojerecach.

Wojerecy (AK/mb/SN). We wobłuku projekta z mjenom „Přećiwo zabyću“, kotrež wjacore měsacy traje a so lětsa hižo 30. króć přewjeduje, je so zawčerawšim we Wojerowskej Kulturnej fabrice zarjadowanje wotměło. Na nim so šulerjo na wšelakore wašnje z časom nacionalso­cializma rozestajachu. Šulerjo su přišli z wyšeje šule a z gymnazijow w měsće – Johanneuma, Lessingoweho a z gymnazija Léon Foucault.

Helga Nickich, bywša wjelelětna předsydka a hač do dźensnišeho čłonka předsydstwa Regionalneho dźěłanišća za kubłanje, demokratiju a perspektiwy žiwjenja, bě zhromadnje z Reginu Elsner (wona je mjeztym zemrěła) ze Zwjazka přesćě­hanych nacistiskeho režima/ Zwjazka ­antifašistow projekt iniciěrowała. Format šulerjow pozbudźuje, so z prašenjom rozestajeć, što to woznamjenja, wšědny dźeń po zasadach demokratije jednać.