Budyšin (SN/VaŽ). Dźensa je zaso tak ­daloko: Šulerjo w Sakskej startuja do zymskich prózdnin. Někotražkuli swójba so zawěsće do zymskeho dowola poda. Druzy sej snano ze zymy wućeknu a budu w prózdninach w ćopłym kraju ­přebywać. Wjele dźěći pak wostanje w prózdninach w domiznje, wšako je tu tuchwilu hišće a snadź bórze zaso rjane wjedro za smykanje a sněhakowanje. Nimo toho su w serbskich zarjadnišćach najwšelakoriše prózdninske poskitki.

Šulerjo prěnjeho do štwórteho lětnika na přikład móža so w prěnim tydźenju prózdnin, wot 9. do 12. februara, do Smjerdźečanskeje Lipy na „Zymskich wjeselach“ wobdźělić. Je to prózdninski poskitk Serbskeho šulskeho towarstwa (SŠT), studija LUCIJA a Rěčneho centruma Witaj. W programje maja pohibowansku a kreatiwnu zabawu kaž tež zaběru z wuknjenskimi medijemi. Popłatk za wobdźělenje wučinja na dźěćo a tydźeń 50 eurow. Zamołwići doporučeja spěšne přizjewjenje.