Chrósćicy (JK/SN). Lětuši hospodarski plan gmejny běše ćežišćo posedźenja Chróšćanskeje gmejnskeje rady minjeny štwórtk. Najebać napjatu financnu situaciju su srědki gmejny za jeje winowatostne nadawki zawěsćene. Nimo toho pak planuja Chróšćenjo wulki projekt, kotryž chcedźa lětsa zwoprawdźić: nowotwar gratownje wohnjoweje wobory. Za tute předewzaće je spěchowanje jasne, financowanje gmejnskeho podźěla za lětsa a klětu pak je tuchwilu hišće njewěste. Trěbne wuhotowanje wohnjowych wobornikow móže gmejna wobstarać – za to su srědki zaručene.

Na zakładźe wobzamknjenja w formje wokolnika – potajkim bjez fyziskeho schadźowanja – je gmejnska rada mjez januarskim a nětčišim posedźenjom próstwu wo wosebite spěchowanje za zakładne wobnowjenje Chróšćanskeje wjacezaměroweje hale „Jednota“ zapodała. W hospodarskim lěće 2025 je Zwjazk spěchowanje komunalnych inwesticijow za sportowanišća z wosebitym regionalnym a nadregionalnym wuznamom wupisał. Cyłkownje steji za to 333 milionow eurow k dispoziciji.