Na kapičkowym wječoru w Njebjelčicach pisany program předstajili

Njebjelčicy. Sobotu je so horca faza póstniskeje sezony zahajiła. W Njebjelčanskej „Bjesadźe“ zeńdźechu so nory z bliska a zdaloka a wjeselachu so na prěni kapičkowy wječor 54. sezony Serbskopazličanskeho karnewaloweho towarstwa. Žurla běše hač na poslednje městno wobsadźena. Kaž w protokolu předwidźane zahaji so wječor ze zaćahom rady jědnaćoch a škričkoweje gardy. Prezident Daniel Wätzig hosći witaše. Ludźo pak čakachu wćipni na amtěrowacu princowsku swójbu. Wšako je lětsa zaso dźěćacy prin­cowski por pódla. Tuž postrowichu z mócnym „WCV helaw“ a wutrobnym přikleskom princa Metoda I. a princesnu Leńku I., kaž tež Janku a Wita z Pedagogistana.