Po 15 lětach zaso skupina družkow a hotowańčow we wěčnym měsće

Róžant (SN/BŠe). Družki a hotowańče serbskich katolskich wosadow su wčera wječor z Róžanta na putnikowanje do Roma wotjěli. Z třomi busami nastaji so 60 holcow a 40 hotowańčow na něhdźe 1 430 kilometrow dołhu jězbu do wěčneho města. „Młodostne su so přeco zaso za tajkim putnikowanjom prašeli“, rozkładźe farar Radworskeje wosady Beno Jakubaš. Chróšćanski wosadny farar Měrćin Deleńk je wotežki skónčnje do rukow wzał a putnikowanje sobu organizował. W lěće 2011 su serbske družki posledni raz do Roma putnikowali. Tuž bě po 15 lětach dawno čas tole wospjetować.

Loni nazymu su fararjo katolskich wosadow wozjewili, zo měli so serbske družki a jich hotowańče na putnikowanje přizjewić. Spěšnje běštej planowanej busaj wobsadźenej. Zdobom steješe hišće něšto zajimčow na čakanskej lisćinje, tak zo so zamołwići rozsudźichu, třeći bus organizować. Hladajo na to, zo bjeru holcy swoju družču a hotowańče swoju narodnu drastu sobu, běše to spomóžne, wšako je za to wjele městna trěbne a kapacita w busach wobmjezowana.