Dźěwin (AK/SN). Bywša hala za jězdźidła dobrowólneje wohnjoweje wobory w Brězowce ma so na wjacezaměrowu rumnosć za tamnišu pěstowarnju „Baćonjace hnězdo“ pře- a wutwarić. Jednohłósnje su radźićeljo gmejny Dźěwin na swojim wčerawšim posedźenju tutomu předewzaću přihłosowali. Cyłkowne kóšty wučinjeja něhdźe 75 000 eurow. Wot tuteje sumy přewza gmejna jako nošer pěstowarnje 30 procentow jako swójski podźěl. Wudawk je wona w swojim lětušim etaće zaplanowała. Hłownje chce jón z pomocu pjenježnych darow financować. Zbytnych 70 procentow kóštow za přetwar chce gmejna ze spěchowanjom z europskeho programa LEADER financować. Za to je hižo wotpowědnu próstwu wo spěchowanske srědki stajiła.