Nimale 30 lět je Sylwija Panošina w Slepom Serbski kulturny centrum (SKC) nawjedowała. Kónc februara so wona na zasłuženy wuměnk poda. Swojemu naslědnikej pak chce tež po tym hišće z dobrej radu poboku stać.
Slepo (JoS/SN). „Hdyž sy wěstu starobu docpěł, dyrbiš swoju zamołwitosć do młódšich rukow přepodać“, praji wjelelětna nawodnica Slepjanskeho Serbskeho kulturneho centruma Sylwija Panošina. Tuž je so lěta 1962 rodźena loni rozsudźiła a Slepjanskej gmejnje zdźěliła, zo so nětko na wuměnk poda. Tak mějachu dosć chwile, kmaneho naslědnika pytać. Wot januara wona Pascala Noacka zadźěła. 1. měrca zhromadnje lětušu jutrownu wustajeńcu wotewritaj. Tež po tym pak budźe dotalna nawodnica swojemu naslědnikej z dobrej radu poboku stać. Tuž drje jeje rozžohnowanje přehórke njebudźe.
