Budyšin (CS/SN). Budyski Statny filialny archiw a Zhorjelski radny archiw stej wědomostnikam dobrej žórle za slědźenje. To wobkrući wčera wječor referentka Katrin Tenner na přednošku Budyskeho zwjazka archiwow w tudyšej měšćanskej bibliotece. Wona bě za tym slědźiła, kak běchu so twórby nižozemskich molerjow w 17. a 18. lětstotku do wobsydstwa sakskeho kurwjercha Awgusta Sylneho dóstali.

Kónc 17. lětstotka poča so situacija na wuměłskich wikach w Antwerpenje změnić. Wiki běchu nasyćene, słody běchu so změnili, druhe luksusowe twory nabychu hódnotu. Poskitk bě wjetši hač potrjeba. Wosebje wulki poskitk mólbow nižozemskich mištrow bě zběrarjej wuměłstwa Awgustej Sylnemu na dobro.