Problem wopłóčkow we Worklečanskim klubje rozrisany
Worklecy (SN/jp). Zetkanišćo Worklečanskeho młodźinskeho kluba njeje wjac najnowše. W containerach blisko šule su so swój čas hižo starši dźensnišich młodostnych schadźowali. Tuž maja tež sanitarne připrawy swoje najlěpše lěta za sobu a młodźina je z nimi zašły čas tójšto wušparanjow měła. Lětsa mějachu za to trěbne pjenjezy nahromadźene a tuž su prózdniny wužiwali, zo bychu nuznik ponowili.
12 000 eurow běchu za to z regionalneho budgeta pod hesłom „Přichod za wšěch“ Hornjołužiskeje hole a hatow dóstali. 3 000 eurow dyrbješe młodźinski klub ze swójskeje kasy přidać. Worklečenjo pak njesmědźachu naprawu cyle po swojim dobrozdaću přewjesć: Puć na nuznik měješe bjez zadźěwkow móžny być. Pola zawoda z Badensko-Württembergskeje skazachu tuž containerowy nuznik, kotry ma prawu wulkosć a bjezbarjerny přistup.
