Budyšin (SN/MWj). Sćerpnosć a dobre čuwy trjebaja šoferojo přichodne měsacy na awtodróze A 4 do směra na Drježdźany. Awtodróhowa tzwr je zdźěliła, zo wot dźensnišeho hač do oktobra 2026 mjez Słonej Boršću a Ohornom na dołhosći 9,2 kilometrow hornju asfaltowu worštu ponowja. „Twarska naprawa je škodow na jězdni dla lětsa předwidźana“, zdźěli nowinska rěčnica Julia Grotjahn. Za čas twarskich dźěłow powjedu stajnje dwě jězdni do kóždeho směra nimo twarnišća, za čož wužiwaja tři dotalnych jězdnjow do Zhorjelca a jednu do Drježdźan.
Wjacore awtodróhowe wotbóčki dyrbja tohodla w rozdźělnych časach zawrěć, kaž Awtodróhowa tzwr zdźěli. Wot dźensnišeho hač do 23. apryla je přijězd na awtodróhu w Porchowje do směra na Zhorjelc dospołnje zawrjeny. Wot srjedź apryla hač do oktobra 2026 pak přijězd na awtodróhu w Hornim Wujězdźe do směra na Zhorjelc zawru. Štóž chcył w mjenowanym času wot Hornjeho Wujězda po A 4 do Zhorjelca jěć, dyrbi pak w Słonej Boršći na awtodróhu jěć pak přijězd w Porchowje wužiwać, ručež budźe tón zaso wočinjeny.
