Trjebin (JoS/SN). Njedźela po jutrach je za Trjebinsku Domowinsku skupinu kruty termin, na kotrymž wona swój kóždolětny nalětni koncert wuhotuje. Něhdźe 70 wopytowarjow je koncert chóra Židźino sobu dožiwiło. Před wosom lětami bě samsny spěwny cyłk hižo w Trjebinje koncertował. Pod nawodom Pětra Cyža předstajichu spěwarki a spěwarjo něhdźe 20 spěwow. Połojca z nich zaklinča serbsce. Wuběr bě přewšo wotměnjawy. Paleta sahaše wot cunich pěsnjow ze srjedźowěka přez serbske ludowe spěwy k sobuspěwanju hač k žortnym poskićenjam.

Chór Židźino bu w lěće 1986 załoženy. Lětsa swjeći potajkim swoje 40lětne wobstaće. Aktualnje přisłuša jemu 28 spěwarkow a spěwarjow. Kóždu póndźelu woni zhromadnje zwučuja. Wuměłski nawoda je spěwar Serbskeho ludoweho ansambla Pětr Cyž. Čłonojo njebydla jenož w Židźinom, ale tež we Wojerecach a wokolnych wsach. W swojim repertoiru ma chór něhdźe 60 spěwow, nimo serbskich a němskich su to tež mjezynarodne.