W Serbskim muzeju stólcy pletli, wołmu přadli a płat poćišćeli

Budyšin (CS/SN). We wobłuku europskich dnjow wuměłskeho rjemjesła skićachu sobotu w Budyskim Serbskim muzeju tudyši wuměłscy rjemjeslnicy dohlad do swojeho dźěła. Spektrum sahaše wot plećenja stólcow přez wušiwanje, předźenje a debjenje jutrownych jejkow hač k poćišćenju płata. Někotre dźěła běchu tak specifiske, zo wopytowarjo rjemjeslnikam radšo jenož přihladowachu. Tola při předźenju wołmy, debjenju jejkow abo módroćišću móžachu so mali a wulcy zajimcy sobu gratu přimać.

Jurij Suchy ze Sulšec je přistajeny w Serbskim muzeju. Hižo 20 lět wón po swjatoku stólcy pleće. Trěbne kmanosće je sej sam přiswojił, přetož tute rjemjesło dźensa hižo nichtó njewukubłuje. Sulšečan wužiwa za to niće z drjewa lianow, kotrež w Aziji rostu. Na prašenje, čehodla so wón runje tutomu rjemjesłu wěnuje, Jurij Suchy wotmołwi, zo je to rjemjesło swojich předchadnikow, kotrež sej wosebje waži. Sobotu jemu Oxana Naumann z bliskosće Połčnic při tym pomhaše.